Now I got the wings to fly to everywhere!!

我的最新日誌

  • 生活瑣事: 準備出發到澳洲 - 悉尼~

    2008-4-29

    仲有一個月唔到, 我就要飛去我人生之旅既第一站 – 悉尼~!

     

    話說我向一年前申請咗一個由澳洲政府搞既 “Working Holiday Program” Visa (簡稱: WHV), 如果你係 30 歲以下既年青人, 就可以上網申請架喇~~ 而小妹非常之幸運地被獲發 WHV 到當地一年, 體驗一邊工作一邊賺取旅費生活同埋四圍遊玩~!!

     

    首先, 我係從未去過澳洲既~ 點解會揀澳洲?? 因為我睇書同雜誌都話澳洲零舍多戶外活動玩 (呢樣嘢絕對啱哂我口味~), 環境同風景以及風土人情都好正~ 自己一路都想去玩至少一個月架喇 (因為我好貪心, 一係唔去, 一去就想睇哂成個澳洲!!)~ 得知呢個體驗計劃, 加上仲後生~ 仲唔拿拿聲去申請~?!

     

    基本上要帶去既物品, 大部份已經有 (我係一個戶外活動人士之餘, 時不時都會 “自遊行”), 係要添置小部份既必需品同埋申請証件啫~ Oh~ 基於安全理由, 小妹係唔會買 Notebook 帶過去~ 所以日誌呢家嘢~ 我一定會儘我所能去上網更新 (因為要搵工同搵地方住吖嘛~), 平時就會 “反樸歸真”, 我手寫 “日誌”~ 不知幾有味道~ 閒嚟 “神來之筆”, “即席揮豪”, 真係別有一番感覺 & 色彩架~~!!!  開始要收拾心情喇~~!!

     

    查看(27) 評論(1)

  • 生活瑣事: 廿年後一次既屋企大裝修~

    2008-4-28

    喺 12 月中至 3 月頭既呢段時間, 屋企嚟一個超級無敵大裝修, 你諗下, 將間屋企入面既嘢由有變冇, 再變返有係幾咁工程酷大, 而我亦喺裝修梗既呢段期間, 搬咗去一位好朋友位於中環既屋企度暫住~

     

    喺中環住既呢段時間, 學識咗好多嘢, 亦都識咗好多新朋友~ 真係獲益良多!!! 睇嚟係去澳洲生活體驗之旅前既學習機會~ 雖然都仲差少少~ 最重要係落蘭桂坊唔洗 5 分鐘~ Hahahahaha~~!!!

     

    喺度多謝好朋友 Winnie 既友情相關照~ 無言感激!!!!

     

    查看(13) 評論(1)

  • 旅遊記趣: 第一次布吉之旅~

    2007-11-25

    9 月 26 - 30 日 (星期三至日) Polly, Emma, Ray 同我, 一齊去布吉旅行~~

     

    Yes!!! 係第一次去布吉咋~ 好開心!! 因為我好鍾意陽光與海灘, 想去好耐架喇~ 今次仲唔俾我恨到~!!

     

    成個 Trip 好好玩~ 一日島島遊 (PP島 ~ 浮潛, 鳥蛋島), Big-C Shopping, 遊車河, 睇日落, 布吉市 Shopping, Hilton Resort Spa…… 真係好歎, 我終於明白點解 D 歐美外國人咁鍾意去渡假~ 又平又歎又靚又好玩~!!

     

    唔講咁多, 俾其中幾張靚相大家欣賞啦~!!

     

    查看(14) 評論(2)

  • 接近兩個月既空檔期...... 宜家我會好好善用時間架喇~!!

    2007-11-05

    係!!  我知道!! 我係懶咗, 差唔多接近兩個月停咗寫 Blog...... 事實上... 我星期六、日夜晚去咗做 Part-time, 所以搞到個人好攰冇乜心情寫...... 二來我又多咗戶外活動, 所以冇時間 Update......

    不過大家請放心~ 由於呢個冬天我實在有太多太多既戶外活動喇 (Camping, Windsurfing and Sailing 啦~), 所以我已經遲咗份 Part-time 唔做 Lu~~~ 因為我就係最最最鍾意玩!!! 與其成日同人請假, 不如遲咗份工專心 D 玩好過啦~~

    咦~~~ 我又真係冇嘢叻~ 玩咪就係我既強項囉~~!!!

    P.S. 原諒我~ 我會儘量寫返 10 月份既精彩活動俾大家分享架~!!!

     

    查看(10) 評論(0)

  • 生活瑣事: 最游記~

    2007-9-12

    喺 9 月 1 日 (星期六), 當所有學生仲喺度準備星期一開學既時候, 我就同成班朋友 (小碧、阿宇、Sam同埋Jackey) 一齊去銀線灣游水~~

     

                             (陽光與海灘~)

     

                       (天空上一舊舊既雲~)

     

    陽光與海灘, 好正呀~~~  D 水清到暈~ 好似去咗東南亞某個美麗海灘咁~ 所以我真係好鍾意夏天呀~ 秋天已經無聲無息咁蒞臨~ 鍾意游水同晒太陽既我, 真係好唔捨得夏天既離去…… 而且出年既夏天, 我都唔喺香港 Lu…… 所以就趁呢個機會~ 好好咁享受下~~~~~~

     

                             (銀線灣海灘~)

     

                         (游去浮台既道具~)

     

                         (真係水清沙幼喇~)

     

    查看(13) 評論(2)

  • 關於食: Cova Ristorante & Caffe Dessert Buffet~

    2007-9-03

    喺 8 月 29 日 (星期三), 約咗 Polly、Ray 同埋 Sylvia 去又一城 Cova Ristorante & Caffe 歎佢哋既 Dessert Buffet~ 鍾意食意大利嘢既我 (特別係 Cheese Cake 同埋 Tiramisu!)~ 一路都好想試 Cova 既 Dessert Buffet 好耐架喇~~

     

         

     

    其實呢個 Buffet 除咗有甜品之外, 仲有 D 小食架~~ 有 Antipasto (意式雜肉)、車厘茄、焗蘑菇、芝士釀辣椒、秀珍姑同埋銀魚配酸橄欖等, 都整得好好味~ 其中辣椒既辣同橄欖既酸, 食完覺得好開胃, 可以繼續涮~! 至於迷你三文治就比較普通……

     

        

     

    甜品方面, 佢有好多款 Cake~ 眼見整係朱古力 Cake 都有四、五款, Tiramisu都有兩款, Cheese Cake 有三、四款 (有我最鍾意既 Blue Berry~!), 有綠茶同士多啤梨 Mousse, 有幾款 Puff 同 Cookies, 仲有好多款小 Cake 小撻…… 我今次真係試唔哂 (太多款喇~)…… 另外呢個 Buffet 會有一款飲品同一個意大利雪糕 (Gelato) 包括埋~! 如果揀橙汁或者柚子汁都係先搾既, 但係數量有限…… 今次係榛子雪糕~ 好 “榛子” 好好味~~~!! 至於未食到既甜品下次一定再試~!!

     

    查看(12) 評論(0)

  • 生活瑣事: 中學同學敍會~

    2007-9-02

    喺 8 月 24 日 (星期五), Kobe 約咗 D 中學同學一齊喺觀塘飲嘢~ 實在係好開心~!!! 由其係見到好耐冇見既小雯~~!!!! 今次出席既有: 泰仔、Kobe、小碧、小雯、肥仔、方包、Yucky、Water 同埋 Chiu Chuen~ 同 D 朋友咁耐冇見… 感覺真係好特別同埋好多嘢傾~~~ 希望日後再有多 D 一齊食飯飲嘢既機會, 再見噃多 D 好耐冇見既朋友啦~~

    P.S. 同場仲撞到 Oscar 既同事 Mandy, 真係有緣喇~~

     

    查看(17) 評論(0)

  • 生活瑣事: 遊船河again…

    2007-9-02

    啱啱喺 8 月 12 日玩完自己搞既大型船河團, 一個禮拜後既 8 月 19 日 (星期日), 參加人哋搞既船河遊~

     

    其實遊船河應該好開心好好玩…… 但係今次呢個船河話俾我聽 – “世事無絕對”~ 點解會咁講呢?? 首先, 船家帶我哋去停船嗰個灣, 本身已經有十幾隻遊艇停咗喺度玩 (之後仲加到廿幾三十隻添, 附近仲有個漁排, D 垃圾就跟住風向飄哂埋嚟, 實在係又污糟又好冇公德心!!)…… 第二, 船家帶我哋去漁排隔離一個好狹窄既灣度玩滑水, 又窄又大浪…… 點玩?? 曾經要求去第二個冇咁大浪既地方玩, 但係佢唔肯! 佢話度度都係咁大浪!!! 激死~~~~!!!! 仲未計佢遲嚟西貢碼頭接人浪費我哋既玩樂時間呢樣嘢~!!!!

     

    鍾意遊船河既我, 日後都要睇船玩! 總之如果係同 “滘西 X 村” 租既遊艇我一定唔會玩~!!!

     

    查看(12) 評論(0)

  • 生活瑣事: 我愛夏日長~ 游水 BBQ @銀線灣!!

    2007-8-29

    真係好耐未試過夏天游水同埋燒嘢食~!! 對上嗰次……應該係仲讀梗初中嗰時?? 真係唔記得囉~ 一直都以為夏天燒嘢食, 又晒又熱, 又驚餵蚊, 所以都幾抗拒… 但係事實証明, 夏天燒嘢食係可以好正好好 Feel 既~!!!

     

    喺 8 月 18 日 (星期六), 一行 10 人 (友人: 阿宇、Jackey、阿勤、阿健、City、阿Sam、小碧、Kobe 同 Leo) 去銀線灣游水燒嘢食, 同埋慶祝阿健同阿Sam 既生日~ 租咗兩把太陽遮既我哋, 一路吹住海風, 一路燒嘢食, 感覺㊣、㊣、㊣~!! 燒到咁上下熱熱哋又飽飽哋既時候, 又可以走去游下水, 游去浮台玩下 Hea 下 (大家千祈唔好學我咁食飽就游水, 需要經過專人訓練先可以咁架咋~ 哈哈哈哈!!!!)~~ 玩到攰攰哋又餓餓哋既時候, 又可以游噃去繼續燒嘢食~~ 不知幾咁開心寫意~~!!

     

    讀書時代游水燒嘢食嗰種感覺又返噃嚟喇~~~ 突然發覺自己後生咗 10 年?! 哈哈哈哈~~~~ 真係好好玩~!! 希望嚟梗有時間, 大家約埋一齊再玩過啦~!!!!

     

              (迷你三寶 – 胡椒粉, 辣椒粉同埋鹽~)

     

                           (海灘必備玩意~)

     

           (筋肉擂台... Oh~ 唔係! 係筋肉浮台至啱~)

     

    (等阿健示範俾大家睇下跳火圈... Oh~ 唔係! 係跳水泡至啱~ 但係個身唔夠直... 我俾 7.5 分啦~)

     

    查看(12) 評論(0)

  • 電影欣賞: 阿森一族大電影 (The Simpsons Movie)

    2007-8-23

    好開心~!!! 我最、最、最鍾意既卡通 The Simpsons 終於有電影版 (查實係電視版個劇本寫長 D 咪係電影版囉)~!!! 喺 8 月 14 日 (星期二), 特登走去百老匯電影中心睇英語版 (我唔鍾意配音, 原裝版夠原汁原味, 由其係 Homer Simpson 最抵死)~~~!!

     

        

     

    雖然係意料中既諷刺抵死兼搞笑~~ 但係佢哋既笑料鑊鑊新鮮鑊鑊金~!! 慘得過係 Matt Groening 永遠都諗到唔同既笑料俾大家, 你又吹佢唔漲呀 (死未)~~!! 哈哈哈哈~!! I always love you The Simpsons!!!

     

     

     

    P.S. 果然係 The Simpsons! 連謝幕都知道觀眾會悶, 所以都搞咗唔少卡通喺謝幕嗰時播, 真係太了解觀眾既諗法喇~~ 佩服、佩服~!!

     

     

     

      

    大家可以 Click 去下面條 Link 睇佢哋既官方網頁:

    http://www.simpsonsmovie.com/

     

    查看(7) 評論(0)

Open Toolbar